Ab Ke Tajdeed-e-Wafa Ka Nahin Imkaan Jaana

Ab ke tajdeed-e-wafa ka nahin imkaan jaana
yaad kya tujh ko dilayen tera paimaan jaana
Yun hi mosam ki adaa dekh ke yaad aaya hai
kis qadar jald badal jaate hain insaan jaana
Zindagi teri ataa thi so tere naam ki hai
hum ne jaise bhi basar ki tera ehsaan jaana
Dil ye kehta hai ke shaayad ho afasurdaa tu bhi
dil ki kya baat karen dil to hai nadaan jaana
Awal-awal ki mohabbat ke nashey yaad to kar
bin piye bhi tera chehara tha gulistan jaana
aakhir to ye aalam hai ki ab hosh nahin
rag-e-meena sulag uthi ki rag-e-jaan jaana
Muddaton se ye alam na tawaqqo na ummeed
dil pukare hi chala jaata hai jaana jaana
Hum bhi kya saada thay hum ne bhi samajh rakha tha
Gham-e-daoraan se juda hai Gham-e-jaana jaana
Ab ki kuchh aisi saji mehafil-e-yaaraan jaana
sar-ba-zaanuu hai koi sar-ba-girebaan jaana
Har koi apni hi aawaz se kaanp uth'ta hai
har koi apne hi saaye se hiraasaan jaana
Jis ko dekho wohi zanjeer-ba-paa lagta hai
shehar ka shehar hua daakhil-e-zindaan jaana
Ab tera zikr bhi shayad hi Ghazal mein aaye
aur se aur hua dard ka unwaan jaana
Hum toroothi hui rutt ko bhi manaa lete thay
hum ne dekha hi na tha mosam-e-hijraan jaana
Hosh aayaa to sabhi khowab thay rezaa-rezaa
jaise urrtey huye auraaq-e-pareshaan jaanaan....