..Hawa thami thi zaroor lekin
Wo shaam b jesay sisak rahi thi
K zard patton ne aandhiyon se
Ajab Qissa suna diya tha
K jis ko sun kar tamaam pattay
Sisik rahey thay Bilak rahey thay
Jaane kis saane-hey k ghum mein
Shajar jarron se ukharr chukey thay
Bohat talasha tha hum ne bhi tum ko
Her ek rasta Her ek waadi
Her ek parbat Her ek ghaati
Magar kahin se teri khabar na i
To ye keh k hum ne dil ko tha taala
Hawa thamay gi to daikh lain ge
Hum tere raston ko dhoond lain ge
Magar humari ye khush-kheyali
Jo hum ko bar-baad kar gai thi
Hawa thami thi zaroor lekin
Barri hi muddat guzar chuki thi
Humare baalon k janglon mein
Sufaid chaandi utar chuki thi
Falaq pe taaray nahi rahey thay
Gulaab paaray nahi rahey thay
Wo jin se basti thi dil ki basti
Wo log saaray nahi rahey thay
Magar ye almiya sab se baala-tar tha
K hum tumhare nahi rahey thay
K tum humare nahi rahey thay
Hawa thami thi zaroor lekin
Barri hi muddat guzar chuki thi..
No comments:
Post a Comment